Ti Lagip Adda Latta a Simamata

Sinapulka
kadagiti rinibu
a lagip,
ngem nagbalin
a bulsek
dagiti matak
ta nakitaka
ti kunak
ngem
dika malasin.

Ipagaruko
no malipatakon
daydi impadulinmo
nga ayat,
ngem saan
ta ipalagipna laeng
di kinupikopak
a sugat.


Uray kayatko
a lipatenka
iti kaunggak-
kayatko
a maitanemka,
ngem ad-adda gayam
nga agungarka
iti linabag ti napalabasta.

Saan a maiturayan
ti panunot a manglipat
ti apges
ken sanaang
a mariknak
iti pusok
a nakaitaneman
ti ulpit
dayta ayat.

Bulsekak man
ta dika makita,
ti lagip
adda latta
a simamata.


TI LAGIP ADDA LATTA A SIMAMATA
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com

*CR.2008.by.rudyram.rumbaoa
___________________________