Marihuana

Ni Rudy Ram. Rumbaoa
*[Naiposte daytoy a daniw iti Iluko.com idi Hulio 24, 2007]


***[Nasurat daytoy a daniw basar iti pudno a pasamak iti maysa a tao: "Gapu iti panakaisungsongna nga agaramat iti Marihuana, nagkudrep ti panunotna. Nagbalin nga adik, nagtakaw, nagbartek, manakiapa ken kanayon a nagar-arapaap iti banag a dina met nagun-od agingga a naduktalanna laengen a dakes ti bunga daytoy nga ar-aramidenna. Babaen iti kalikagum ti manakaawat a gayyemna, tinulonganna daytoy "durugista" tapno mangabaroanan iti biag. Iti agdama, manarimaan ti panakaisubli ti sigud a kasasaadna [rehabilitate]." Kayatko ngarud nga isagut daytoy a daniw kenkuana kas pakalaglagipanna iti nagbalin a nasipnget a napalabasna]
-------------


nagbanglon daytoy napagango a bulongmo
no masay-opka nagpaiduma ti angotmo,
ket ti lasag awisen-gutigotenna
makasulisog kalbit ti asuk nga itdenna.

naim-imaska a lang-aben no mabilutka
bulongmo a mapuoran kasta unay ti banglona,
umatibuor nga asuk, kaslaak la agar-arapaap
al-alawek ti angesko a kasla magsat.

awan makaartap ti ragsak ti alimpatok
agkallautang kararuak panunotkot' di agsusurot,
mapaksuyanak a mangalaw iti kabaelak
iti bileg daytoy nagpaiduma a pagduyosak.

pasetkan kaniak a nakaisadsadak
nanglibeg panunotko a nakailaw-anak,
iturayannak ti awismo ket diakon maliklikan
tapno ikutam ti lubongko nga isut' pagbabaywan.

sapsapulenka iti tunggal pinanid ti biagko
in-inutem a purosen ti masakbayan ken arapaapko
anansata, tunggal pug-awkot' asukmo pabang-arenna
kasla maipalais kararuak, malipatak dagiti problema.

a, nakiron ti dana a nasurotak
nayaw-awanak, awanen daydi urnos ti biag
ta nasimbalud dagiti sakak napukawko ti namnama
iti narugiak a bisio, siakon ti naiwawa.

kunak iti bagik: "kabaelam bagi nga itarayan
daytoy a bisio a nakailaw-anam,
nupay nabileg unay daytoy a nagayatam
adda pay la namnama iti kamaudianan."

[CR.2007.by.rudyram.rumbaoa]
_________________________________