Panagbalbaliw

Ni Rudy Ram. Rumbaoa






kunam kaniak: iti panagsublim lintegem
dagiti biddut a naaramidam kenka naikawesen,
ngem diak ammo no mariknam ti mariknak ita
tunggal agsublika iti sidongko adda pasetko nga agsagaba.

wen, tunggal agkamangka ket ipeksam kaniak
dagiti aramid a nakailaw-anam siak ti masugat,
kunam: um-umkis iti kaunggam ti panagbabawi,
ngem kas karina kadi a maibabawi ti narasi a kari?

a, naulpit unayen ti nagbanagan ti gasatmo,
awanen ti napintas a turongen ti panunotmo
ta kanayonmo a yaleng-aleng dagiti pammagbagak
ket iti kamaudiananna masakbayam sika't mangrakrak.

ita, kunam pay kaniak: kayatmo a mapunas
ganna ti piglat a pinarnuaymo ti napalabas,
namin-ano kadin a rinugiam ti panagbalbaliwmo
kanayon met a malpay gundaway ken arapaapmo?

kunak manen kenka: waknitam nga umuna ti dalan
ket liklikamon dagiti aramid a pakaikarunokonam,
lipatemon ti biddut, saem ken nagbanagam
namnamaem a mabang-aranto dayta kaunggam.



[copyright 03, november 2007 by rudy ram. rumbaoa]
___________________________