Kinasikap ken Disiplina

Ni Rudy Ram. Rumbaoa




nakadayon ni pidro nga immuli iti ngato
addan isuna iti aringgawis ti kayo,
ngem di paabak ni lakay mundo
ta adda iti sirokna a sumarsaruno.

iti di unay adayo kadagiti dua
adda dita da angkuan ken kolasa,
kasla tekka kaalisto't panagkapetda
dida kayat paabak kalikagumanda ti gunguna.

ngem saan la nga is-isuda ti bida
adda pay di immuli manipud iti baba,
arigna a kasla aggiinnurayda
patas a laban dayta man ti kayatda.

linnaingan nga umuli ti nagan ti ay-ayam
salisal daytoy dagiti ubbing ken nataengan,
ti umuna a makapantok isu't makoronaan
agbalinto pay a mangibagi iti masakbayan.

di napakadaan ni pidro, naspak ti sanga
napaisem ni lakay mundo daytan ti gundawayna;
ngem kasta unay siddaawna iti kinasiglat dagiti dua
da angkuan ken kolasa, perme ti paspasda.

gistaydan madanon ti ngato, padapada amin a nagpababa
natuang ti kayo gapu ngata ti kadagsenda,
awan nangabak, awan naabak ngem naadalanda
iti ay-ayam masapul ti kinasikap ken disiplina!

[copyright18november2007byrudyram.rumbaoa]
_______________________________________