Wen, Kailiwko Unay

Ni Rudy Ram. Rumbaoa




Kailiwko, Maui, daydi bara ti arakupmo
Iti naudi a panagsarangta kasla mauyos 'toy angesko;
Kunak daytoy ta awan man la't imbalikasmo
Pimmanawka't sidongko nariknak saem iti barukongko
Nadagsen dagiti addangmo nga immadayo...

Natuok a saan dagiti aldaw a nagbattaway
Binilbilangko't bulan nga innak panaguray,
No maminsan sutilennak areng-eng ti sulisog
Tapno guloenna't nasimbeng a panunotko
Ket ikaranukonnak iti agaw-awis a limdo...

Ngem diakto aramiden ti kasta, Maui,
Ammom a napudnoak iti insapatak a kari;
Agur-urayak ta patiek addanto tiempo nga agsublika kaniak
Tapno biagenta't napalabas itanemta ti sugat...

Wen kailiwko unay, Maui, daydi nasarangsang a katawam
Nagbalin a ray-aw kaniak kasla samiwengda iti kaunggan;
Ta asino,aya, ti di maliwliwa iti kinadungngom kaniak
Idi impaaymo't langit ken di magatadan a ragsak?

A, agur-urayak ket patiek nga awanen ti makatubeng
Lamma ti piglat in-inut nga inkupinen ti panawen,
Wen umayka ta riingenta't naituglep a rikna
Ket agdanggayta a mangiwaksi mansa ti panagduadua
Ken pasangbayenta ti isisingising ti baro nga agsapa!



[copyright 05november2007 by rudy ram. rumbaoa]
__________________________________________