Ayat Nga Inka Isangbay

Ni rudy Ram. Rumbaoa




Aldawko nabattaway
'Toy ayat mainaw
Di met maipasngay,
Nakiro't lubongko
Awan man pangisadagak
nNaimut ti gasat tapno
Mariknak ragsak a kalikagumak...

Awan man ti kaipapan
Musika innak pinutar,
Ta tunggal nota unina
Ti kasla maparpar
Parnuayenna't ayug
A mangipalagip ti nagbanagak
Ditoy pusok
Sugatna ti umukuop...

Ngem simmangbayka
A nangwaknit panes
Tapno agbiag ti namnamak
Iti baro a desdes,
Inikkam ti lawag
Daytoy nasipnget a dana
Tapno makitak talaytayek
Nga agturong kenka.

Ammok a sika
Ti pudno a kaibatogak
Nabirokak mamaggutok
Pusok a kaikariak,
Ket linukaisam liday
A nagtaeng kaniak
Tapno ikkam ti kaipapanan
Dagiti nalpay nga arapaap...

Ita, inikkam namnama
Ti nabaybay-ak nga ayat
Tapno agbiagak iti dayta pammateg
Nga agari iti kaunggak,
Maidalimanek metten
Saning-i iti apagapaman
Tapno maruros ken tapayaen
Ti sumangbay a pagbinnuligan...

Matagibi ti karinkari
Tapno di mapungsay
Ti panakaipasngay-ayat
A mangted linglingay,
Ket ditoy a mapanday
Ti sinninggalut
Kawar a mangpaneknek
Ti Dios Apo managsagut.

Agbunga amin dagitoy
Ket agsampagada
Iti ayat nga inka isangbay
Ket maitalimengda,
Agbannawag man
Ti sabali nga aldaw
Maitanemton
Dagiti sagubanitko ken ar-araraw...

Ala, umayka ngaruden, Biagko,
Agsadag kadagiti abaga
Tapno mariknam ti dungngo
Ken pammategko kenka;
Sisipenta ti diro ni ayat
Ket ipapasta-
Ngamin nasapulak
Ti ragsakko kenka!



[copyright 2007 by rudy ram. rumbaoa]
_______________________________