Pannubok Ti Masakbayan

Ni Rudy Ram. Rumbaoa



Umayka...
itugotmo ti libro ti sirib
ket ibasam iti linaonna
ti panunot no maasa
patademenna ti agmudelen a namnama.

Agtrabahoka...
tapno ti biagmo umno ti turongenna
saanka a paipada kadagiti nayaw-awan
iti tunggal kanen nga isubom, adda grasia
agbati a maigamer iti panunot saan laeng iti tian.

Agbasaka...
dimo sayangen ti tunggal panagpitik ti oras
tunggal addang umno koma dana a pagdaliasatam
tapno iti masakbayam awanto't pagbabaywam
balligi ti biag naragsak ti inka maragpat.

iti tiempo ti lamiis, adda tiempo a napudot
kasta met ti biag, adda ragsak ken liday
ita umayka, agtrabahoka, agbasaka
tapno ti pannubok ti masakbayan, agballigika!



[copyright november2006byrudyram.rumbaoa]
_________________________________________