Dagiti Tugot Iti Kadaratan

Iti maysa a rabii a natagtagainepko
Magmagnaak iti kadaratan a kaduak ti Dios,
Mabuyak iti tangatang dagiti naglasatak ti biag:
Iti maysa, makitak dagiti dua a paris dagiti tugotko
Ken ti sabali a paris- isu ti tugot ti Dios.

Idi maipakita ti maudi a buya,
Mariribukanak unay ta maymaysa laeng
Ti sangaparis a tugot iti kadaratan;
Diak maawatan dagiti pasamak,
Iti kadaksanggasatan ken kalilidayan
A paset ti panagbiagko;
Maymaysan a paris dagiti tugot iti kadaratan.

Sinaludsodko ngarud iti Namarsua:
"Diosko, kunam nga apaman a makadesionak a sumurot kenka,
Atibayennak agingga iti panungpalan ngem nadlawko
A kabayatan dagiti karirigatan a paset
Ti panagdaliasatko iti biag,
Sangaparis laengen dagiti tugot.
Saanko a maawatan no apay a no kasapulanka unay,
Isu met ti panangbaybay-am kaniak..."

Sinungbatannak ti Dios:
"Napateg nga Anakko, ay-ayatenka,
Ni kaano man saankanto a baybay-an.
Kabayatan dagiti panawen a panagrigat ken panagsagabam
Makitam a sangaparis laeng dagiti tugot iti kadaratan
Agsipud ta idi nagrigat ken nagsagabaka, sinakroyka,
Dagiti tugot a makitam iti kadaratan, isu ti tugotko...!"

DAGITI TUGOT ITI KADARATAN
Rudy Ram. Rumbaoa
CR2006/RRR/www.samiwengkenayatnirudy.blogspot.com


_____________________________________