Ni Rudy Ram. Rumbaoa
mariknak ti liday iti kaadayom kaniak
rinibu a milia imbatik tugotko dita denna,
tapno dagitoy ti saksik subliakto ti karik
ken ukagenta't lagip nga imbaulen ti panawen.
adda latta sutil ti sulisog nga umar-arubayaan
tapno iraremna dagiti mainaw nga arapaap,
ngem nasnebanakon a mangsaranget ti pannubok
ket ilalaek nga irutan pammateg a nagkinarian.
bay-anta nga agpayakpak ti ragsak nga umapon
iti kaunggan dagiti pusota tapno maikupin ti kalman,
ket say-opek iliw nga umabrasa kadagiti sardam
aprosmo a panakaawat a mangep-ep ti kinaliday.
wen, di malibak mawaw latta ti kararuak
sika't inspirasion iti nawatiwat a danak,
dita taklinmo pasantakenta diro ni karayo
tapno aglunit ti sugat nga imbati't tugotko.
[copyright.december.2006.by.rudy.ram.rumbaoa]
_____________________________________________
No comments:
Post a Comment