Diak Agragut

Ni Rudy Ram. Rumbaoa




Diak agragut ti pumanaw
iti disso a naggapuak,
ditoy ti ayan ti nagtaudak
nagbalinen daytoy a pagtaengak

Patiek adda met pagrang-ayan
iti lugar a nakayanakan,
'suna lang narigat ti bumaknang
mabayag ngem adda pagbanagan.

Diak iyapal ti bagik iti sabali
ngem matakderak dagiti isawangko a kari,
pakaidayawak ti makiragup iti sabali a puli
daytoy ti kapnekan a kabaelak met ti agballigi.

Iti lugar a papanan masapul met nga annadan
ti ugali ken takder kapulapol a tattao dimo ida maawatan,
denggen a naimbag, utobem ti ibagam
amangan no daytoy ti puon ti diyo pagkinnawatan.

Laglagipem met ken indiam a kanayon
aramid a nainlubongan saan nga agnanayon
ta daytoy ti mangisebba ken innaka ikalang
agbabawikanto man ngem ania pay ti maaramidam.

Iti amin nga aramidem dimo koma lipatan
ti Dios Apo a sarikedkedmo ken karaptam,
mamatika nga awanto pulos ti pakasaktam
uray umay dagiti pannubok awanto ti pakaan-anoam.

Wen, diak agragut ti pumanaw
iti disso a dimmakkelak ken naggapuak,
ditoy ti 'yan ti kaipapanak ken ragsak-
ngem adda kaniak a mangtimon ti pagturongak
tapno sapulek ti naimbag ken naraniag a gasat.


[copyright 2007 by rudy ram. rumbaoa]
________________________________