Ni Rudy Ram. Rumbaoa
Nasamay a mangibaba iti dagsen ken timbengenna ti rukod ti kolesterol"
ITI maminsan pay a gundaway, pinaneknekan ti Atkins diet ti bukodna a pamatian: "Makatulong ti low-carb diet ken iti estilo ti Mediterranean regimen kadagiti tattao nga agkalikagum a mangibaba ti dagsen ngem iti tradisional a low-fat diet iti maysa kadagiti kabayagan ken kadakkelan a panagadal tapno ikumpera ti weight-loss techniques."
Ti kadakkelan a surpresa? Pagdur-asen ti low-carb diet ti kolesterol. Ngem saan a mamati dagiti dadduma a kritiko. Kuna ni Abby Bloch iti Dr. Robert C. ken Veronica Atkins Foundation, a "mapaneknekan daytoy ket pudno." Dayawen dagitoy grupo ti pilantropo ti Atkins diet creator.
Nupay kasta, nagun-od dagitoy tallo: "low-carb diet," "low-fat diet" ken ti makuna a "Mediterranean diet" ti wagas a mangibaba iti dagsen ken pagdur-asan ti kolesterol. Saan a kadawyan daytoy a panagadal gapu ta immabot iti dua a tawen, at-atiddog ngem iti maipagarup, ngem ketdi, adda pakainaigan iti kaadda ti interes dagiti tattao nga agdiyeta [adda 85 a porsiento].
Inasitgan dagitoy a nagsukisok ti Atkins Foundation tapno mayuman daytoy nga idea ti panagadal kadakuada. Ngem awan ti kangrunaan nga akem ti nasao a foundation iti nadisenio a panagadal wenno mairakurak ti agbalin a resulta. Dinayaw dagiti sabsabali pay nga eksperto ti resulta ti panagadal a "saan a nakapapati, ngem pudno."
Iti biang ni Kelly Brownell, director ti Yale University Rudd Center for Foods Policy and Obesity, a "mararaem dagitoy a grupo a nagsukisok. Saanda a maulbod ti napaneknekanda."
Malagip a naaramid ti panagsukisok iti maysa a lugar ti nuclear facility iti Israel. Naited kadagiti agarup 322 a partisipante ti kompleto a pannangan iti bigat, aldaw ken rabii iti kapeteria ti nasao a pasilidad. Nalasin ti tunggal taraon babaen iti colored dots. Naaramat ti kolor a nalabbaga para iti low-fat, berde para iti Mediterrean ken asul para iti low-carb.
Para iti pamigat ken pangrabii, nabagaan dagiti dieters nga aramidenda ti kaugalian a planoda iti pannangan, kalpasanna, sinungbatanda ti sumagmamano a questionnaires no ania ti klase ti kinnanda. Saan a nasurok ngem 30 a porsiento ti calories manipud iti taba ti low-fat diet, maiparit ti calories ken kolesterol ken maipamaysa ti low-fat grains, nateng ken prutas kas kasukat ti taraon. Adda pagkaarngian ti Mediterranean diet iti calories, taba ken cholesterol restrictions- kangrunaan ditoy ti poultry, lames, olive oil ken nuts.
Adda limitasion ti low-carb diet iti carbohydrates, ngem awan iti calories wenno taba. Magutigot dagiti dieters nga agpili iti vegetarian a paggapuan ti taba ken protina. Iti panangilawlawag ni Madelyn Fernstrom, weight management expert ti University of Pittsburg, nagrekisa iti panagadal ngem saan a karaman daytoy, "Saan nga ipauneg ti adu a keso ken itlog wenno krema."
Kaaduan kadagiti partisipante ket lallaki. Amin a lalaki ken babai iti panagadal ket naipaayanda pay iti bilang ti panagwatwat.
Mapattapatta a bilang ti nakaibabaan iti dagsen iti grupo ti low-carb diet ket 10.3 pounds kalpasan ti dua a tawen. Nakapukaw met iti dagsen dagiti Mediterrean diet iti 10 pounds ken iti low-fat regimen iti 6.5 pounds.
Surpresa ti rukod ti kolesterol. Kuna dagiti kritiko a makatulong ti Atkins diet iti panagibaba ken panangpukaw dagiti tattao ti dagsen. Ngem pinagamkan ken nagbutnganda ti kinabayag ti proseso, ta segun met la kadakuada, mabalin nga ipangatona ti kolesterol gapu ta maipalubos ti taba nga ipauneg.
Ngem iti estilo ti low-carb, makita a padur-asenna ti sumagmamano a rukod ti kolesterol nga agturong iti HDL, wenno ti "good cholesterol." Kas pagarigan, maysa kadagiti tao ti addaan iti HDL a 50, mabalin nga adda ratio a 4-to-1. Ti optimum a ratio ket 3.5-to-1, segun iti American Heart Association. Ti pasiente a bumaba ti ratio ket maysa a senial iti panagtangken dagiti arteries. Bumaba iti 20 a porsiento iti tao a low-carb diet, 16 iti Mediterrean ken 12 a porsiento iti low-fat dieters.
Saan a daytoy ti kaunaan a panagadal a mangibaga iti pagdiperensiaan manipud iti kaarngi ti Atkins diet. Iti impablaak dagiti nagsukisok iti Journal of the American Medical Association idi tawen 2007, naammuan ti JAMA ti resulta ti Atkins diet iti insayangkatda a pagsubok para kadagiti nalukmeg a babbai: "simmayaat bassit ti blood pressure ken cholesterol readings no idasig iti low-carb Zone diet, low-fat Ornish diet ken low-fat diet." Amin dagitoy a pagsubok ket nagtungpal iti pagannurotan ti gobierno ti Estados Unidos.
Nabayagen nga irekomenda ti Heart Association ti low-fat diet tapno mailisi iti panakairisgo ti puso iti ania man a kita ti sakit, ngem nasintir dagiti dadduma [a lideres ti HA] a natalged ken epektibo pay ti Mediterrean diet. "Kinaagpaysona, irekomenda ti HA ti low-fat diet uray pay no ad-adu ti maiparit a taraon nga ipauneg segun iti ipaneknek ti panagadal," daytoy ti inlawlawag ni Dr. Robert Eckel, HA past president ken propesor ti medisina iti University of Colorado, Denver.
Saan nga irekomenda ti HA ti Atkins diet. Nupay kasta, maitunos ti low-carb approach iti pagannurotan ti HA basta adda limitasion iti klase ti saturated fats a masansan nga ipapauneg dagiti tattao.
Pabor iti resulta ti baro a panagadal ti "Atkins-like" kadagiti grupo ti diabetics ken babbai a naeksamen. Kadagiti 36 a diabetics, dagiti laeng Mediterranen diet iti bimmaba ti blood sugar levels da. Iti biang ti 45 a babbai, dagiti Mediterranean dieters ti nakapukaw iti dagsen.
Kuna ni Dr. Willian Dietz, nangibagi ti Centers for Desease Control and Prevention, nga isingasing iti data a nalalaing a sumungbat dagiti lallaki no iti panagdiyeta ti pagsasaritaan ta nalawag nga ammoda ti limitasion iti taraon nga ipaunegda. Ngem nalalaing dagiti babbai a mangiwayat iti panagibaba ti dagsen gapu ta addaanda iti ekspiriensa iti panagdiyeta, ammoda a yimplimentar ti mas komplikasion a panagdiyeta. Ni Dietz ti pangulo ti CDC nutrition unit.*
________________________________________
No comments:
Post a Comment