Ngem asino ni Jack?
NAYANAK ken dimmakkel ni Jack Legal iti Masbate, maysa a probinsia a masarakan iti akin-tengnga nga abagatan a paset ti Filipinas, iti "Visayas." Iti geyograpiko, maibilang ti probinsia a paset ti Visayas, ngem iti rehion, paset ti Bicol. Malaksid a makapagsao iti Masbateno ni Jack, ammona pay ti Cebuano ken Bicol a pagsasao.
Ti pamilia
DIMMAKKEL ni Jack iti maysa a mararaem a pamilia isu't gapuna a maawatanna ti kinaimportante ti pondasion ti pamilia iti sosiodad. Inawat ken impategna ti sursuro ti Catholic Christians ta debosionado dagiti nagannakna iti Simbaan Katoliko. Gapu ta napigsa ti impluensia ti sursuro iti simbaan kenkuana idi ubing pay, kayat ni Jack ti agserbi iti Dios. Ngem rinaem ni Jack ti pagayatan dagiti nagannakna, nagserbi kas altar boy iti simbaan ti St. Vincent, iti nakayanakanna nga ili ti Cataingan ti Masbate. Nasursuro ni Jack ti nagbalin a padre de pamilia idi nasapa a pimmusay ti amana.
Ti edukasionna
NAGDESISION ni Jack a suroten ti tugot dagiti gagayyemna idi immuna dagitoy a simrek iti seminario. Ngem in-inut a nagikkat dagiti gagayyemna iti seminario agingga ni Jack laengen ti nabati. Nupay nagpapanawan dagiti gagayyemna, nakapagturpos met laeng ni Jack iti Holy Rosary Seminary College iti Naga City, Bicol, ken nagun-odna ti B.A. Philosophy. Intuloyna ti nagbasa ket nagturpos iti St. John Seminary ti Camarillo, California ken nagun-odna ti kina-Master of Divinity. Kalpasanna, nagadal iti kina-abogasia iti La Salle University ket naawatna ti Doctor of Jurisprudence degree ken miembro daytoy iti American Bar Association.
Nakakatkatawa nga ekspiriensa
IDI sangsangpet ni Jack, saanna ammo ti maturog ken usaren ti bed sheets ken blanket. Iti lugar a naggapuanna, maturog daytoy iti datar a saanna nga aramaten ti ania man a blanket gapu iti kinapudot ti klima. Sinaludsod ni Jack iti padi no kasano ti maturog gapu ta gangannaet ti langa ti katre kenkuana. Insungbat ngarud ti padi nga agkumot daytoy, ngem gapu ta nabannog ni Jack, nakaturog iti rabaw ti blanket.
Kuna ni Jack, no taliawenna daydi panawen a panagsaludosdna iti padi, mautobna no kasano ti rigat ti maysa nga imigrante nga ibagay ti bagina iti sabali a pagilian. No panunoten kuna ni Jack, ibagay ti maysa nga imigrante ti panagbiagna iti aglawlaw, nakiro, adda amin a red tape ken business practices a masapul a surursuroen ti maysa tapno agballigi ti negosio.
Taldiap
IDI tawen 1977, naordenan ni Jack a padi iti Nativity Church, El Monte, California ken nagserbi kadagiti parokia ti El Monte, Covina, Glendale, Gardena, West Covina ken Santa Monica iti Archdiocese ti Los Angeles.
Tawen 1983 idi nagsubli ni Jack iti bukodna nga ili ti Masbate ken nagserbi kas maysa a pastor iti simbaan no sadino a nagikasabaanna ti Naimbag a Damag iti agarup 25 a barrio iti tallo a tawen. Inako ni Jack a dina ekspektaren ti adu a karit iti panagawidna iti bukod nga ili ket ditoy a naimatanganna ti panagtalinaed ti kultura a pinanawanna. Awan nagbaliwanna. Awan telebision. Awan danum ken elektrisidad. Adun ti nagtaeng nga anay kadaydi pinanawanna a pagtaenganda.
Iti uneg ti tallo a tawen kas pastor, nakaur-or ni Jack iti pundo para iti baro a bangonenna a rectory- a kompleto ti kusina ken banyo. Idi damo, pagduaduaan dagiti kaparokianona ti nasao a proyekto, ngem idi makita ti panakabangon ti kombento, maysa-maysa ti nagidonar iti kuarta. Kinabaelan ni Jack a pinagkaykaysa ti komunidad ken ginutigotna ida a patienda ti bukodda a kabaelan.
Idi damo, maysa koma laeng a tawen ti panagtalinaed ni Jack, ngem nagbalin a tallo. Ti panangikomitna iti bagina ti nangipalubos kenkuana nga awatenna ti kinasimple ti biag iti ili a naggapuanna. Inted daytoy nga ekspiriensana ti panakabigbig a naimbag dagiti banag a mangted iti ragsak.
Serbisio iti militar
NAGSUBLI ni Jack idi 1987, inayaban ti United States Army isuna tapno agserbi kas Catholic Chaplain iti ranggo a kapitan. Naidestino iti Hawaii idi 1989. Kuna ni Jack, ti panagserbina iti militaria ket maipanakkelna. Kunana a maipasetna kadagiti soldado ti naespiritual a kasapulanda. Kas maysa a Chaplain, agtrabaho ni Jack iti nagduduma a religious denominations ken agserbi iti pagilian babaen iti panagserbina kadagiti soldado ken ti pamiliada- ania man ti pammati dagitoy.
Babaen kadagitoy a nagbalin nga ekspiriensa ni Jack, adu ti naadalna. Nagserbi iti Pohakuloa area ti BIg Island, ti National Training Center iti Mojave Desert, nakipaset iti joint exercises idiay Egypt ken South Korea. Gapu iti dedikasionna iti militaria, naawatna ti pammadayaw a Meritorious Service Medal iti Shofield Army Barracks, a nakadestinnoanna agingga idi 1991.
Panagserbi iti komunidad
NAGSERBI ni Jack kadagiti sumaganad: Presidente ti Filipino Chamber of Commerce of Hawaii Foundation, Chair- Small Business Committee, Chair- International Affairs Committee. Karaman pay daytoy iti professional associations kas iti National Association of Realtors, Certified Residential Specialist, Co-Chair ti Grievance Committee, ti Honolulu Board of Realtors. Miembro pay ni Jack iti Hawaii Commemorative Quarter Advisory Commission ken ti Hawaii Chamber of Commerce and Affliated Chamber & Business Organizations.
Pagibusan ti oras
NAGBALIN a ballroom dancer ni Jack manipud idi 1991. Kunana a maysa a porma ti panagwatwat ken socializing ti ballroom dance. Magustuanna a kaam-ammo dagiti tattao iti lugar ti pagsasalaan. Gapu iti ayatna iti daytoy a klase ti sala, nagbalin a presidente iti Hawaii Ballroom Dance Association manipud 1996 agingga iti 1998. Sabali pay a paggugusto ni Jack ket ti ay-ayam a golf. Sabali laeng ti panagsurat, public speaking, ken karaoke. Aktibo a miembro ni Jack iti St. Jude Catholic Church iti Kapolei.
Filipino Chamber
IDI damo, ipagarup ni Jack nga agsubli daytoy idiay California ngem inawis ti gagayyem ti pamiliana nga agbati iti Hawaii ken tapno mapagtalinaed ti real estate licensena-- inaramidna ngarud idi 1991. Babaen ti awis ti sabali a real estate agent, nakikameng ni Jack iti Filipino Chamber idi 1998 tapno mapalawa ti trabahona. Kuna ni Jack, idi damo kasla pagkedkedanna iti panakikamengna iti chamber gapu ta buklen ti grupo dagiti propesional ken successfull business people, ken gapu ta awan met ti bukodna a negosio. Ngem nabara ti kablaaw ken panangpasangbay ti grupo kenkuana.
Kas resulta iti pakipartisiparna iti trade mission, kinabaelan ni Jack ti kimmamang kadagiti nesgosiante iti Filipinas. Ita, maysa daytoy a makipagtagikua iti sabali a negosio- aglako iti real estate properties iti Filipinas. Kas miembro ti Filipino Chamber, ditoy a nasursurona a bangonen ti bukodna a negosio. Mamati ni Jack kas maysa a negosiante, addanto tiempo a magun-odna ti financial independence ken mapasayaatna ti panagiturong iti negosio.
Immuna a nagtrabaho iti Chaney Brooks, kalpasanna, iti Realty Executives-Aloha, ken West Oahu Realty. Babaen iti inspirasion dagiti gagayyemna, binangonna ti bukodna a real estate company- ti Legal Realty idi tawen 2000. Kas Chair of the Government Affairs Committee itay napalabas a tawen, nakipaset ni Jack iti public policy issues. Nagun-odna ti suporta ti komunidad. Kuna ni Jack, "sursuroan ti bagi, pasayaaten dagiti solusion ken agbalin nga aktibo."*
____________________________
No comments:
Post a Comment