Pagtalinaedem ti Arapaap

 Ni Rudy Ram. Rumbaoa

 Nadawel latta, Sofia,
ti 'yeg dagiti agkakamakam a pannubok
ta di mauma a mangibanesbes
ken mangisaplit kas katadem ti punial
a maiduyok iti kaunggam ti apges ken ut-ot.
Maamirismo itan, Sofia,
a pumusay met
dagiti nadarisay nga arapaap;
ti nasam-it a darepdep,
a kabuyog ti umsi
a maitungpa iti kinataom
ta uray kasano a liklikam daytoy
dimo mapetpetan dita dakulap ti gasat...

Ngem dika agsanud
agabanteka ketdi,
dika agsuko ta tipping laeng
dagitoy a pakasuotam iti biag.
Dimo ipalubos a malmeska
iti gagarmo a lumung-aw,
pagtalinaedem dagiti arapaapmo
iti agnanayon a kinadalus ti puso
ta isuda ti gamengmo.

[CR.2008.by.rudyram.rumbaoa]
___________________________