Ni Rudy Ram. Rumbaoa
| MAKAPNEK ti nagbalin a resulta manipud iti agas a maawagan iti "Rember." Ti agas ket partuat ti Tau-Rx Therapeutics a nakabase idiay Singapore. Dakdakkel ken naipalawa ti naisayangkat a panagadal iti daytoy, ket babaen iti ipakita ti resulta , adda pagsayaatan a pakausaran ti nasao nga iti masangnguanan nga aldaw. Kuna ni Marcelle Morrison-Bogorad, direktor ti Alzheimer's research iti National Institute on Aging, a daytoy ti kaunaan a positibo a resulta a nakitana iti panangisardeng ken pananglapped ti panagkapsut ti panunot. "Di nakapapati, ngem agpayso!" Innayon ni Morrison-Bogorad. Pinundoan iti nasapsapa a gundaway ti Federal Agency ti panagsukisok. Ti panagkalatkat ken panangbangen ket buklen iti protina a maawagan iti "tau" ken tumaud daytoy iti uneg ti nerve cells. Kadagiti naglabas a dekada, impamaysa dagiti sientista ti nagduduma a klase ti protina- maysa ditoy ti "beta-amyloid," agporma a kasla sinankawit ken magpataud iti pigket iti ruar ti selula- ngem awan pay ti napartuat nga agas para iti daytoy. Ti agas ket addan iti maikadua iti tallo a tukad iti panangpasayaat, ngem ad-adda nga ipamaysa dagiti sientista ti kangrunaan nga panakaagas gapu iti enormiya ti sakit a mabalin a pagsagabaaan ti 26 a milion a tattao iti intero a lubong. Iti agdama, adda laeng uppat a klase ti agas a para iti Alzheimer a mangnam-ay ti simtomas iti utek. Insingasing ti hepe ti Tau-Rx Claude Wischik, maysa a biologist iti Universidad ti Aberdeen ti Scotland ken maysa kadagiti kabayaganen a nagsukisok ken nagadalanna iti maipanggep ti "tau tangles," a waraen ti Rember dayta a panagkalatkat wenno panagbangen. Iti panagadal, naited kadagiti 321 a pasiente a nakipaset iti daytoy ti maysa iti tallo a doses ti Rember wenno dummy capsules, mamitlo iti maysa nga aldaw. Adda ramen dagiti nangato a dose ti kapsula a mamagtalinaed kadagiti agipauneg a napigsa ken agtultuloyda latta iti trabaho, idinto ti nababa a dose ket mangpataud iti kinakapsut isu't gapuna nga agtalinaed ken kumaro ti sakit iti pasiente. Nupay kasta, makatulong ti middle-dose kas ipaneknek ti rukod ken score ti panagawat ti panunot. Iti sabali a bangir, napukaw dagiti tattao a nagusar iti placebo ti maipagarup 7 a porsiento ti panagtrabaho ti utekda iti uneg ti innem a bulan, idinto a saan a kimmapsut ti panunot ti dadduma a madama a maag-agasan. Kalpasan ti maysa a tawen, agtultuloy nga agkapsut ti panunot ti grupo dagiti agipapauneg iti placebo, ngem saan para kadagiti agus-usar iti mid-level dose ti Rember. Iti uneg ti sangapulo ket siam a bulan, dagitoy agus-usar iti Rember ket saan a maibilang a pasiente ti Alzheimer. Adda nakasagana a dua a brain scans a maipaay iti agarup apagkatlo kadagiti paritisipante, ket ipakita ditoy nga aktibo ti droga iti lugar ti utek kangrunaan a maapektaran ti tau tangles. Imballaag ni Wischik a saan daytoy a "suggestive data," ken awan ti pammaneknek. Saan pay a nakasagana a maawat ti kangrunaan a kemikal ti Rember a makita iti sabalisabali a langa ti pormulasion iti agas a naaramat idi tawen 1930's para iti chronic bladder infections- ti "methylene blue." Saan a pinagarisgaran ti Food and Drug Administration a nagadalan ti kinatalged ken ti kinaepektibo ti agas, ken saan nga iti porma iti panagadal ti Alzheimer. Iti rakurak dagiti dadduma a nagsukisok iti International Conference ti Alzheimer's Desease, napnekda iti resulta manipud iti pagsubok ti nagduduma nga experimental drugs nga impamaysada a kinita ti problema ti tau tangles. Naaramat ti nasao nga agas babaen ti Allon Therapeutics, Inc. a nakabase idiay British Columbia, a naisubok kadagiti tattao nga addaan iti Alzheimer precursor ken mild cognitive impairement. Makita ti resulta ti tau-drug iti stark contrast iti Flurizan, ti gagemna daytoy ket tapno bangenanna ti enzymes nga agporma iti sinankawit a beta-amyloids. Ngem saan a nagballigi ti nasao nga agas isu nga inrakurak ti Myriad Genetics a saandan nga ituloy a pasayaaten pay ti Flurizan gapu iti panakapaayda a nangpadur-as. Masipsiputan pay ti nagbalin a resulta iti panakasubok ti "bapineuzumab," maysa nga experimental drug- ti gagemna ket tapno ilista ti immune system iti panadalusa ti utek manipud iti napigket ken sinankawit a nangbangen kenkuana. Kuna dagiti nagpartuat iti bapineuzumab, ti Wyeth a nakabase idiay New York ken ti Irish company nga Elan Corp. PLC, a saan ken awan ti immimbagan ti 240 a pasiente a nakasubokan ti nasao nga agas. Ti gagem daytoy nga agas kadagiti pasiente ket tapno mapadur-as ti mental performance iti uneg ti sangapulo ket walo a bulan. Ngem naduktalan ti kompania ti pirak a linya- maipagarup a nakatulong ti agas iti 60 a porsiento kadagiti tattao iti panagadal nga awanan iti gene a kunaen dagiti sientista a daytoy ti mamagkaro iti sakit nga Alzheimer. Indaydayaw ketdi ti kompania ti nagbalin a kinaepektibo ti agas kadagiti sabsabali a pasiente, ngem pagamkanda ti mabalin ken posible a side effects ti agas. Adda sangapulo ket dua a kaso ti klase iti panagbussog iti utek a timmaud kadagiti nagusar iti bapineuzumab ngem awan iti grupo ti placebo. Ti panagbussog wenno panagletteg ket maigapu iti bassit a simtomas, ngem iti ruar, degdeganna ti mapataud a side effects. Mamindua wenno ad-adu pay a daras a komon a marikna dagiti pasiente a nagipauneg iti bapineuzumab ngem kadagiti naikkan iti dummy drug ti agbalin a side effects. Kas koma, iti kaso ti anxiety iti 11 a porsiento kontra iti 4 a porsiento ti placebo; paranoia, 7 a porsiento kontra iti maysa. Nagreklamo dagiti dadduma a pasiente iti panagsarua, nangato a presion ti dara, panagbaba ti timbang ken sakit iti likud. Adda nairakurak a tallo a pimmusay manipud kadagiti 124 a pasiente a nagipauneg iti bapineuzumab, ngem awan pakainaiganna iti droga. Maysa ti pimmusay gapu iti neumonia ken dua a sabsabali pay gapu iti kakaro ti Alzheimer's desease. Addan iti maudi a tukad ti panagsubok iti bapineuzumab ti Wyeth ken Elan. Maipagarup nga adda 4,000 a tattao ti makipaset iti daytoy.* _____ |
No comments:
Post a Comment