Bituen

ni Rudy Ram. Rumbaoa



Sipud rinugiam nga inasak ti desdes a pagarupem
Nga agbalin a rangtay dagiti arapaapmo--
Saan a nabual ti pammatim a maragpatmo ti kalikagummo,

Ngem tunggal aksaw dagiti saka, adda latta karit
Nga agur-uray iti tunggal pannakidangadangmo--
Ta adda met dagiti nagarapaap iti tay-ak a sinerrekmo.

Mamatika ketdi iti kabaelam uray maikurkurimed
Ti apas ken gura iti likudam, ti panangipaay
Iti linglingay ti ad-adda a nagari iti pusom.

Iti maminsan pay, agtakderka a napnoan taer
Nupay dumaldalagudog ti nagtipon a kebba ken ragsak
Iti barukong iti pannakailukat ti kurtina ti entablado

Ta masansan a kastoy nga okasion iti pakangngegam
Iti saan nga agsarday nga ikkis a mangidir-i ti naganmo
Ti agsublisubli nga agparang, nayurit ti kinaasinom.

Nupay nalamiis ti palayupoy ti angin, nabarbara
Ti agangsaw a pudot a mariknam a mangdarang iti rupam
Manipud kadagiti narimat a silaw a naipaturong kenka.

Napigsa ngem nalimbong ti gumgumluong nga orkestra
A surnadan ti natibong a sipsipat dagiti naariwawa
Nga agdengngeg iti bukod a pagsasao. Adda pannakapnek!

Nasaksiam ketdi nga uray taoka lang, mariknam
A tumpaw met dagiti sakam gapu iti rag-o
A gapuanan iti adu a pannubok a nagdaliasatam,

Ta dagitoy ti bunga ti ling-et a nagbannogam.
Yikkis ken ipukpukawdanto latta ti panagsublim
Tapno maimdengan ti samiweng nga agtaud iti kaunggan.

Makupinto man ti pakasaritaam, adda inna ibagasan.
Aglayagto latta iti ere a kas iti angin a mayaw-awan
Ti boses a kinupkupikopam. Agbiagda iti panunot.

Ngem iti pannakatuknom ti langit, adda met dagiti rabii
A di masirayan dagiti naririmat a bituen,
Gapu kadi ta nabatida iti tanap, ili ken siudad
Ket napnekkan a mangtangtangad iti nasipnget a law-ang?