Salisal

ni Rudy Ram. Rumbaoa

 

Linnaingan nga umuli iti kayo
Ngannganin ni Dolpo iti ngato,
Ngem di paabak ni lakay Berto
Adda iti sirokna a sumarsaruno.

Ti di unay adayo kadagiti dua
Adda da Angkuan ken Kolasa,
Kasla tekka kaalisto't kapetda 
Padapada a kalikaguman gunguna.
 
Ngem saan la nga is-isuda ti bida
Adda pay di immuli manipud baba,
Arigna nga aggiinnurayda
Patas a laban dayta ti kayatda.

Linnaingan nga umuli awag ti ay-ayam
Salisal dagiti agtutubo ken nataengan,
Ti umuna a makapantok isu't makoronaan
Agbalin a mangibagi iti sabali a paay-ayam.

Pagammuam di napakadaan ni Pidro naspak ti sanga
Napaisem ni lakay Berto daytan ti gundawayna,
Ngem kasta unay siddaawna iti kinasiglat dagiti dua
Da Angkuan ken Kolasa, kasla naibuat a pana ti kaalistoda.

Gistaydan madanon ti ngato, padapada amin a nagpababa
Natuang ti kayo gapu ngata ti kadagsenda,
Awan nangabak awan naabak ngem naadalanda
Iti ay-ayam masapul ti kinasikap ken disiplina!

[CR.//11.23.08//by.rudy.ram.rumbaoa]
______________________________