Bay-am a Pumusay ni Ayat

ni Rudy Ram. Rumbaoa
Alani Place, Wailuku, Hawaii
[nasurat idi 6.17.10]

Kunak manen, Magnolia,
A waknitakon ti panes
A namagmanto iti pusok
Gapuanan iti kinabalangkantis
Nga ayat nga impagarupko
A pakariknaak iti ragsak...

Ngem nagkamaliak.

Itanemkan iti daga
Tapno in-inut nga agrupsa
Ti lagipmo kaniak;
Tapno malapdan sabali pay
Nga irurusing ni ayat
A mangipalagip ken mangsukay
Iti sugat nga ad-adda a pakasaktak.

Laglagipem, Magnolia,
Sangapulo ket lima a tawen
A tengngelnak ti ayatmo,
Ngem saan nga agnanayon
A baludnak ti pagayatam.

Iti inaldaw a tinagibik ti liday
In-inut a maalas-as nabatbati a pigsak,
Ngem laglagipem daytoy:
Saan la nga ita nga aldaw
Ti aldaw nga isisingising
Dagiti nadarisay nga arapaap.

Agpitikto latta ti pagorasan
A kas met iti pusok nga agayat
Tapno maipasngay ti baro a namnama
Kas iti panangdayas ti kaipasngay nga init
Ti naatap a sabong ti orkidia
Tapno agbukar ken agadiwara
Ti pusaksak ken banglona...

Kunak, nalpasen nga intanemka.
Ti napalabas- ti kalman a nagbinnuligan
Dagiti naatap a pusota.

Bay-am kadin a pumusay ti ayat
Tapno diakon dung-awan
Ngem pagbiagak!


[copyright by rudyram.rumbaoa]