Malaglagipkanto Latta

[maysa a ladawan ti sabong ti Hawaii]

Ni Rudy Ram. Rumbaoa
[nasurat 6.2.11]

Gapu kenka, agsampaga dagiti sabong iti hardin,
a kaniak, agpampanaas manipud iti russuak ti ayamuom.

Nalipatak kadin ti rupa,
wenno diak malagip dagiti ima;
kasano a marikna ti bibigmo ti bibigko?

Ngem gapu kenka,
paggaayatko dagiti mayepyepyep a napudaw a rebulto iti parke,
dagiti rebulto a saan a makatimek wenno makakita.

Nalipatakon ti timekmo, ti narag-o a boses;
uray dagiti nalanay a matam, nalipatakon.

Kas iti sabong nga agayamuom ti banglona, adtoyak, kiddawek
a malawagan ti nakusnaw a lagipko kenka. Agbibiagak iti panaas
kas iti maysa a sugat; a no sagidennak, saanen a mabalin nga agsubli
iti dati a langa ta nalpasnak a sinaktan.

Kupkupikopannak dagiti aprosmo,
kas iti panagkarayam dagiti lanut iti pader.

Nalipatak payen ti ayat, ketdi, kasla mabuybuyaka ti apagapaman
iti tunggal tawa a pagtamdagak.

Ngem gapu kenka, agayamuom kaniak ti panaas-kalgaw;
manen, tagtagi-urayek dagiti pagilasinan tapno agbunga
dagitoy a tarigagay: kas iti panaglabas ti layap iti tangatang,
banag nga agtennag kadagiti dakulap.

[copyright june 2011 by rudyram.rumbaoa]