Duayya

[Ti Bannawag Magazine a nakaipablaakan ti daniw, Abril 16, 2012 Issue]

DUAYYA
ni Rudy Ram. Rumbaoa
[nasurat.2.10.2012/maui]

Naladawen, nakarkaranen ti dalan;
mabalin a nalabit awan ti dalan ditoy,
dagiti laeng lamok ti pagilasinan iti kudil ti layus,

wenno dagiti ablat iti agpada a luppom.
Nasiludka, kunam? Narigat a patien. Saan a kasapulan.
Idulinmo ti bukod a timel ta agsaksi para kenka.

Agsaoka't napigsa tapno maawatan; uray nangato't timekmo
napigpigsa a panangibalikas uray no daytoy ket saan a pudno.
Ngem saanen a nasken, awan ti mangaw-awag iti naganmo,

nagpiestaan dagiti kulibangbang ti rabii dagiti wara a sapatos,
ket iti pananglabas ti panagrurunos ti narakrak a pasdek,
nairuar iti dalan dagiti natadtad a bara.

Madamdama umayton ti sipnget, ayunan dagiti insekto ti konsolasion
ket nakasaganan dagiti nalawa a pagtugawan a para kadakuada;
no koma ta dagiti payakda ket mangted iti linged ken ringgor,

ikkannak iti pagilasinan: awan kadakuada't mangngeg wenno makitak.
Agay-ayam pay laeng iti binnattuan ti nalabaga a kawes iti inaladan,
nagtalinaed nga awan saosao dagiti kawitan, napno't pagpupukonda iti bituen.

Isu a maturogka, sika a maag, aginana ken agtalinaed a kalmado,
ket awanto a pulos ti manguriro kenka- awan uray asino.

[copyright.2.10.2012.by.rudy.ram.rumbaoa]