INA

[Nabulod ti ladawan a naaramat]

i.

Binuybuyak ti panangsulidmo

ti amarilio a naranghita ken panagdekorasion

ti buokmo iti sabong. Ket iti kinapintas

ti bistiam, kas ko la makita ti panagay-ayamko

iti maysa a kalgaw a kaduak ti panagbannawag

ti bullalayaw; agliblibbiang ti kasapulan a pusaksak.

Inlawlawagmo nga inabel dagiti managanito

ti bullalayaw, impasngay ti lubong dagiti sabong

a saanna a narikna ti ut-ot, ket nakitak ti ragsak

kadagita isemmo; ti maris ti bullalayaw,

ti makasisirap a lawag ti init, ti rag-o iti aglawlaw.

No agtaguob ti angin iti taaw, makitak manen

ti panagbuteng ti rupam, adda alliaw dagita matam.

Inalistoam a sinulid ti amarilio a naranghita,

inleppasmo nga ingibus ti estoriam 

ket sinallapidmo ti buokmo iti nakaal-alisto...

ii.

Iti panagtabon ti init iti taaw, kas met kenka 

a nagsubli iti sidongko. Tunggal aldaw linagipmo

ti danumdanum nga inka panagpasngay,

simmileng ken limmawag dayta rupam

kas iti maris ti agpakada nga ilelennek ti init.

Ngem kasla saan a sikat' dati nga am-ammok,

kankantaam ti panagsabuag dagiti dalluyon

ti yaagepda iti aplaya idinto a ngumerngernger 

ti bosesmo iti panagpakada ti init; gungungen 

ti bagiw a mamalukay ti dalluyon ket mabatiak

a martir iti rekuerdo ti kinamaladaga-

Ken uray siak, saan idi a natalinaay ti panunotko

no agtaguob ti angin-taaw. Adda panagamakko.

Adda panagbuteng, ngem binuya, binantayanka

iti asideg ti warakwarak a kiaw a panangharitaen

a balay, pinerrengmo dagiti matak kas maysa a diosa...

iii.

Kinaagpaysuananna, arigko ti maysa a martir

iti rekuerdo ti kinamaladaga, inlemmeng ti rupak

ti nagkaadu a palimed nupay dagiti dalluyon

ti Pasipiko ti kakaisuna a makaammo ti an-anayen

ti pusok, nalabit uray pay ti angin-taaw, am-ammonak.

Mamatiak ket ti pammatik naitalimengda iti pusok-

dagiti karayan ket anak a babai ti taaw, 

dagiti dan-aw ken lago isudat' anakna a lalaki.

Saan a matabingan ti ulep ti naganus a panunot,

no adda man nakabasolak, ngem awan uray asino,

uray pay ti nadawel a baybay wenno nadangkok

nga alipugpog-taaw ti manglibeg ti pammatik;

Ket diakto pulos isukat ti pammati ti inak

ta isu ti pammati a namulagatak, wenno

ti bileg dagiti inuugma a himno wenno kanta,

ti kinapudno dagiti estoria ti amarilio

a naranghita a kastilio ti diosa ti taaw-

ti kinadaeg ti nakaparsuaan a paggargarawan...

INA

Rudy Ram. Rumbaoa

Dagiti Koleksion a Daniw, Sarita, Kanta ken Dadduma Pay

www.samiwengkenayatnirudy.blogspot.com