ITA TA NATAGIKUAK

ITA TA NATAGIKUAK

Rudy Ram. Rumbaoa

Ita ta natagikuak ti rupam babaen ti pusok, miraenka.

Ngem palidemen ti hamba ti naisangsangayan

Nga aspekto no sadino a ti membrilio ken sandia

Aglanglanga nga amarillo iti apagsegged nga apuy

Iti panagilad ti dalia iti dutdot ti payak ti tumatayab

Ket mangirurumen dagiti mangbalballaibo nga agpaspastor.

Iti labesna, maysa a hardin. Adda sadiay nga iturong

Ti nakuspag a nam-ay ken ti pigura dagiti marmol

Agbuya iti sabali pay a mapalabas a kalgaw nupay

Dagiti ramit a pagpukan agbibitin iti kayo ti mansanas.

Ngem ita ta natagikuak ti rupam babaen ti pusok, bigbigenka.

Tallo dagiti disintonado nga uni a nasurat iti nalidem a panid

Ket ti ayug saan a para iti tao a naitangkal iti musika

Nga iti ladawan a mangipakpakita iti maysa a konsepto 

Ken nakamboran iti balikas a mamagkintayeg ken mangsugat.

Maralabus nga agkuti ti itsura ti panuli iti labes ti saan 

A maimaldit a balikas. Iti dua a tagtagaimpek, masapul

A mayebkasko ti kaririknak iti bagiw, iti agtartaray nga agus.

Layanglayang ti panagkompas ti kanta

Ket agbaliw ti nota iti kasipngetan.

Ngem ita ta natagikuak ti timekmo babaen ti pusok, denggek.

Dagiti dakkel a pantalan a pagsangladan dagiti barko

Ken biahero; ti panangurnos ti pannakailayag dagiti karga

Ken dagiti ganggannaet agbalin a tagabo iti aplaya ti sirok

Ti asul a tangatang. Wen, saan daytoy a panagpakada;

Nalpasen ti atiddog ken nawatiwat a panagdaliasat.

Naipaabay ti dakkel a reppet iti bato; nagsangit a naibaba

Iti danum ti aglatlati nga angkla, naggaraw a di nadnadlaw

Ti atiddog a lanut iti sikigan ti naapgad a hierba

Iti nakalawlawa a taaw a sinakup ti darang ti init.

Ngem ita ta natagikuak ti pusom babaen ti pusok, wen, makitak.

Ti BANNAWAG Magazine a nakaipablaakan ti daniw idi Setiembre 9, 2013



For promotional purposes:
Karaman daytoy a kanta "ATIDDOG ken NATANGKEN" iti baro nga album ni Maestro Alex Reyes Barut a mai-release iti mabiit.
Words by Rudy Ram. Rumbaoa
Music by Vhen Bautista
Music Arranged by Israel Allen Pascua

PADAANAN!