Dagiti Puted a Daniw

iti maikadua nga aldaw ti hulio iti dayta met la
a tawen, inawatna ti ayatko. kas pammatalgedko
kenkuana, diak mulitan panagtalekna kaniak.
nagkariak a ragsak ti sagrapenna iti dennak.
isu lat' ay-ayatek, isut' samiweng ken ayatko.

intuloymi ken ni may ti rinugiak a putar a kanta
a pagduetoan ti lalaki ken babai. isu pay ketdin
ti nagsurat iti koro ti kanta ket anian
ta magustoak man ti panangyatblatna kadagiti
balikas nga inusarna ta maibagay unay iti musika.

basar ti panagawatko iti liriko a sinuratna,
kanta daytoy dagiti puso a naginnadayo,
dagiti agayan-ayat gapu ti ayatda
a mailung-aw ti kasasaad ti panagbiagda:

"rinibu man a milia ti kaadayom kaniak
kanayonka a maipalagip iti kaunggak,
nalawa man a taaw ti inta nagbaetan
ti pusok sika lat' inna aw-awagan

dagiti ladawam no buybuyaek ida
sumken ni iliw diakon magawidan dagitoy lua
dagus nga alaek ti cellphone-ko
ta dayta timekmo umanayen a ragsakko..."

urayak la simgar iti kinapintas ti pannakasangal
dagiti balikas iti kanta. daytoy nagbinnuligan
a pinutarmi, isu metten ti nagbalin
a theme song ti ayan-ayatmi a pinauloak
iti pammategmo. ket manipud idin,
namarisen ti lubongmi ken ni may--


a kas man awan ti liday a sumangbay...
.
.
.
.
.
dagiti puted a daniw:
samiweng ken ayat
rudy ram. rumbaoa
dagiti koleksion a daniw, sarita, kanta ken dadduma pay
[peb.2o11]