Dagiti Puted a Daniw

adalemen ti rabii idi malpas ti inaramidko
a surat para ken ni may. diak inggaan
a suratan ta kayatko a paneknekan kenkuana
a nagbalbaliwakon. manen, inlawlawagko
a tinallikudakon ken nagsinakamin ken ni magnolia.

nariknak kettang iti siketko gaput' nabayag
a panagtugawko a nagsurat. inyuldagko
ti bagik iti kama. kas man la maipigket
tunggal letra ti daniw ni may iti panunotko.

agpayso ngata a singsingirennak ti konsensiak?
innalak ti surat, kayatko manen a padalanan.
ti daniwna ti dagus a tinurong dagiti matak.
apay, aya, a binaybay-annak? dayta ti paulo
ti daniw. nabainanak la ngarud
iti maudi a paset ti daniw--

"apaman a mabasam 'toy daniw ti un-unnoyko
sinuratko daytoy iti oras a panagsensennaayko,
dika koma agsangit no dita pusom maipalagipdanto
ti gartem iti lasag, minulitam ti panagtalekko

wen, agragsakka ta sagrapek ti liday
ta inkalangmo daytoy ayat a nadarisay
ket laglagipem koma ti innak itarigagay
agsingsingpetka, biagko, ta isu ti maipaay..."





dagiti puted a daniw:
samiweng ken ayat
rudy ram. rumbaoa
dagiti koleksion a daniw, sarita, kanta ken dadduma pay
[peb.2o11]