Dagiti Puted a Daniw

nagayad ti isem ti gayyemko a kartero
nga agobra iti post office ti laoag
a nangyawat kaniak ti sobre 
iti dayta a bigat ti lunes. adda ragsak
a naipinta iti rupak idi mabasak
ti nagan ti naggapuanna. ni may.
hong kong ti nailanad nga adresna.

iti gagarko a mabasa ti linaon ti surat,
linuktak, ngem napasennaayak idi agangay.
kasla paspasagidannak tunggal binatog
ti surat. nabainanak la ngarud idi mabasak
amin ti pakabuklan ti surat.
nabagas ken napnoan kaipapapan.

"ngem apayaunayen, aya, ta naidasayak
binaybay-annak laeng. nagturedkan, biagko,
ta dinak man bitibiten; di met aya siak
kadagidi immuna nga aldaw inka samsam-iten
ngem nagbalinak gayam apagbiit inka papaiten?"

 ad-addan a maabisigkot' pakabuklan
ti surat. nailaw-anak iti aramid a pagbabaywak.

agay-ayam ti isipko iti dayta a rabii.
pilpilitek nga itarayan ti biddutko
iti napalabas ngem kasla al-aliaennak
ti panunotko. sidsidirennak kadi ti nagbiddutak?
wenno, konkonsensiaennak ti inaramidko?




dagiti puted a daniw:
samiweng ken ayat
rudy ram. rumbaoa
dagiti koleksion a daniw, sarita, kanta ken dadduma pay
[peb.2o11]