Ita Nga Aldaw

DINAK sagutan ti regalo nga alisto

Nga agpukaw iti imatang. Ketdi, itedmo

Ti maysa a banag nga agnanayon nga agtaeng

Ken matagikua ti puso ken panunotko...

.

.

.

.

.

ITA NGA ALDAW

Rudy Ram. Rumbaoa

Dom. 21 Hun. 2o26

Wai, Maui

samiwengkenayatnirudy.blogspot.com

#itangaaldaw #ilokodaniw #putedadaniw #aldawdagitiamma #wailuku #maui #samiweng #ayat #rudyramrumbaoa

KAS IYEBKAS TI BIAG [Ken ni Emeterio]

KAS man awan aniaman ni patay,

Awan pannakaibilangna; napanka

Naginana iti bangir a kuarto

Wen, kas man awan napasamak.

Awan nagbaliwan ti amin,

Nagtalinaed nga isu la nga isu.

Siak ti siak, sika ti sika ket ti duog

A biag a nagbinnuligan saan pulos

Nagaraw ken napabaro. No aniat'

Adda idi, nagtalinaed iti fondasionna.

Awagannak kadagiti daan ken sirok

Ti latok a nagan, kasaritanak

Iti alisto a wagas kas aramidem.

Awan duma ken diferensia tono

Ti bosesmo, dimo met inkawes

Iti rupam ti serioso ken leddaang;

Umisem-agkatawaka kas iti dati.

No maminsan, agbulbulitor

Ken agang-angawka; ngem dagitoy

Isuda ti ragsak kadata, ti familia.

Dimo pinalugodan a mamulitan

Sangkaamaan a nagan nga aywanmo

Binay-am ida a nagsao uray awan

Esfuerso wenno gannuatda--nga uray

Awan kadagitoy ti aniniwan ti al-alia;

Kayatna nga ipasimudaag nga amin

A banag ket naibaga, naiparikna

Naipaawat kas iyebkas ti biag nga

Inton kaano man, isu ti sigud a kalidad

Ti agnanayon a di pannakarakrak.

Daytoy kadi nga ipupusay karakteristiko

Ti situasion a mabalin nga awan aksidente?

Apay daytoy pakaburiboran ti panunotko,

Gapu kadi ta saan nga isut' turong imatangko?

Agur-urayak kenka, iti maysa nga interludio,

Ti maibaet a pabuya--manipud iti asideg a lugar

Wenno ti lugar nga asidegka laeng kaniak

Ket amin a kinasayaat, naimbag.

Awan masaktan; awan mapukaw.

Maysa a nasayud a pitik ti panawen

Ti panaguray, agsublinto kas iti dati,

No kasanonto ti agkatawa iti baet

Ti panaginnadayo--agkitatanto manen!

NARAGSAK NGA ALDAW DAGITI AMMA, AMA!    

.

.

.

.

.

KAS IYEBKAS TI BIAG

[Ken ni Emeterio]

Rudy Ram. Rumbaoa

samiwengkenayatnirudy.blogspot.com

#itangaaldaw #ilokodaniw #kasiyebkastibiag #aldawdagitiamma #emeterio #samiweng #ayat #rudyramrumbaoa

Kunak Man: Iti Daytoy Nga Aldaw

 

Iti Daytoy Nga Aldaw...

Kuna ti dadduma a saan [kano] a kas ti panangrambak iti Mother's Day ti kinaimportansia iti pannakalagip ken pannakaselebrar ti Father's Day. Hmm...diak ammo no apay a nasaoda ti kasta? Ngem no abisigentay' a naimbag, biddut daytoy a panangipapan.

Ti panangrambak iti aldaw dagiti amma ken inna ket agpada nga importante kadatayo nga annak tapno maipalagip no asino ken no ania ti akem dagiti nagannak iti inaldaw a panagbiagtayo, [wenno daytoy] ti wagas a panagyaman [kadakuada], panangrespeto, panangpatalinaed [linnangen wenno panagkikinnamayet] ti kinaurnos ken kappia iti tunggal kameng ti pamilia. Tunggal maysa kadakuada, adda bukodda nga akem nga iserbi iti pamilia ken kadagiti annak.

Isu mammet a naikkanda ti bukod a pannakalagip ken pannakaselebrar nga aldaw.

Kas pagammotayo, ti ina isu ti silaw [wenno lawag/rangrang] ti pamilia, idinto ti ama isu ti teddek wenno pondasion a nakaikumitan ti responsibilidad [kas ti panagdesision kadagiti banag nga importansia iti pagsayaatan wenno masakbayan ti pagtaengan nga idauloanna]. Agpadada nga ari ken reyna ti pagtaengan.

Ket no bilang mapundi ti bombilia [silaw], saan kadi mabalin a masuktan? Amman. Ngem no ti teddek [pondasion] ti marebba—matuang ti pagtaengan. Matnag dagiti alikamen. Maparalisado ti sibubukel a pagtaengan. Ngem depende iti situasion ta agpada a mabalin a masuktan tapno mangabaruanan ken mangrugi iti sabali a basingkawel ti biag.

Ngem aniaman ti agbalin nga akem dagitoy dua a mangidaulo ti pagtaengan, agpada ket agpadadanto latta nga importante iti pagsayaatan ti pamilia ta isuda ti mangibagnos, mangbalanse saan laeng a pannakataraon dagiti annak no di pay ket ti pannakaiwanwan ken mangbayabay kadakuada - [espiritual, pisikal wenno pinansial man a banag] bayat ti panagdakkelda iti nakiro a lubong a paggargarawan.

NARAGSAK A PANNAKARAMBAK KEN NABARA A KABLAAW TI ALDAW DAGITI AMIN NGA AMMA. AGBIAGKAYO!

.

.

.

.

.

Kunak Man: Iti Daytoy Nga Aldaw

Rudy Ram. Rumbaoa

Dom. 16 Hun. 2o24
Wailuku, Maui

samiwengkenayatnirudy.blogspot.com

[nabulod ti ladawan a nausar]