Ni Rudy Ram. Rumbaoa
Nagpatnga iti entablado
Ti agpabuya a narapis a lakay
Iggemna ti tulbek a manglukat kadagiti aldaw
Yawatnanto iti sumaruno nga agparang.
Nupay saan a kas iti dati ti ragsak
A naipinta iti rupa 'toy duogan
Ta ammona a dinton agbayag
Iti entablado a pagpabuyaan
Nalaus ketdi ti yamanna
Iti amin a nangasibay kenkuana
Iti sangapulo ket dua a bulan
Sadiay, linagipna ti napalabas:
Isasangbay dagiti kalgaw ken layus
Panagayus ti dara ken lana ti oliba
Panagbannawag ken idadateng ti sumipnget
Panagsabong ken panagapit.
"Tarabayennakayo koma ti Apo!"
Sipapakurang nga indawatna
Inwagisna ti imana a tanda
Ti inna panagpakada
Iti entablado nagal-aludoy nga immulog
Tapno umuli a sumaruno nga agpabuya
A maysa a maladaga...
Naipablaak iti Bannawag, Enero 25, 2010 Issue
______________________________________
No comments:
Post a Comment